ಬೆಳ್ತಂಗಡಿ: ಅಕ್ಟೋಬರ್ 4, 2026 ರಂದು ರವಿವಾರದಂದು ಬೆಳ್ತಂಗಡಿ ತಾಲೂಕಿನ ಪಡ್ಡಂದಡ್ಕದ ಶ್ರೀ ರಮೇಶ್ ಶೆಟ್ಟಿ ಅವರ ಮನೆಯಲ್ಲಿ ‘ಬಂಟ ವಿಚಾರ ಗೋಷ್ಠಿ’ಯು ಅತ್ಯಂತ ಅರ್ಥಪೂರ್ಣವಾಗಿ ಜರುಗಿತು.
ಬಂಟ ಸಮುದಾಯದ ಆಚಾರ-ವಿಚಾರಗಳು, ದೈವಾರಾಧನೆ ಮತ್ತು ಇತಿಹಾಸದ ಬಗ್ಗೆ ಬೆಳಕು ಚೆಲ್ಲುವ ನಿಟ್ಟಿನಲ್ಲಿ ಈ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು.ಕಾರ್ಯಕ್ರಮದ ಆರಂಭದಲ್ಲಿ ಶ್ರೀ ರಮೇಶ್ ಶೆಟ್ಟಿ ಅವರು ಪ್ರಸ್ತಾವಿಕ ನುಡಿಗಳನ್ನಾಡಿ, ಅತಿಆತಿಥ್ಯ ಹಾಗೂ ಗೋಷ್ಠಿಯ ಉದ್ದೇಶದ ಕುರಿತು ಮಾತನಾಡಿದರು.
ಶ್ರೀಮತಿ ಮಲ್ಲಿಕಾ ಅಜಿತ್ ಶೆಟ್ಟಿ ಅವರು ‘ಬಂಟರ ಆಚಾರ ವಿಚಾರ – ಅಂದು ಇಂದು’ ಎಂಬ ವಿಷಯದ ಕುರಿತು ಉಪನ್ಯಾಸ ನೀಡಿ, ಸಮುದಾಯದ ಸತ್ಸಂಪ್ರದಾಯಗಳು ಮತ್ತು ಇಂದಿನ ಬದಲಾವಣೆಗಳ ಕುರಿತು ಸವಿಸ್ತಾರವಾಗಿ ವಿವರಿಸಿದರು.
ಮಹಾಬಲ ಶೆಟ್ಟಿ ನಿಟ್ಟೂರು ಅವರು ‘ಬಂಟರ ದೈವಾರಾಧನೆ – ಅಂದು ಇಂದು’ ಎಂಬ ಗಂಭೀರ ವಿಷಯದ ಬಗ್ಗೆ ಮಾತನಾಡುತ್ತಾ, ತುಳುನಾಡಿನ ದೈವಾರಾಧನೆಯಲ್ಲಿ ಬಂಟರ ಪಾತ್ರ ಹಾಗೂ ಅದರ ಐತಿಹಾಸಿಕ ಹಿನ್ನೆಲೆಯನ್ನು ವಿಶ್ಲೇಷಿಸಿದರು.
ಡಾ./ಶ್ರೀಮತಿ ಸುಜಾತ ಶೆಟ್ಟಿ ಅವರು ಬಂಟರ ವೀರ ದಳಪತಿ ‘ದೇವು ಪೂಂಜ’ ಅವರ ವೀರಗಾಥೆ ಹಾಗೂ ಇತಿಹಾಸದ ಕುರಿತು ಉಪಯುಕ್ತ ಮಾಹಿತಿ ನೀಡಿದರು.ಪ್ರತಿ ಉಪನ್ಯಾಸದ ಮುಕ್ತಾಯದ ನಂತರ ಸಭೆಯಲ್ಲಿ ಮುಕ್ತ ವಿಮರ್ಶೆ ಹಾಗೂ ಚರ್ಚೆಗಳು ನಡೆದವು.
ಕಾರ್ಯಕ್ರಮದ ಕೊನೆಯಲ್ಲಿ ಉಮೇಶ್ ಶೆಟ್ಟಿ ಆರಂಬೋಡಿ ಅವರು ವಂದನಾರ್ಪಣೆಗೈದರು. ಸಮುದಾಯದ ಅನೇಕ ಗಣ್ಯರು ಹಾಗೂ ಆಸಕ್ತರು ಈ ವಿಚಾರ ಗೋಷ್ಠಿಯಲ್ಲಿ ಉಪಸ್ಥಿತರಿದ್ದು ಕಾರ್ಯಕ್ರಮವನ್ನು ಯಶಸ್ವಿಗೊಳಿಸಿದರು.
