ಕನ್ಯಾಡಿ :ಸ್ಥಳೀಯ ಸರಕಾರಿ ಉನ್ನತೀಕರಿಸಿದ ಹಿರಿಯ ಪ್ರಾಥಮಿಕ ಶಾಲೆ ಕನ್ಯಾಡಿ-II ಧರ್ಮಸ್ಥಳದಲ್ಲಿ ಅ. 21 (ಬುಧವಾರ) ರಂದು ಶ್ರೀ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯ ಅಂಗವಾಗಿರುವ ‘ಶೌರ್ಯ ಮತ್ತು ವಿಪತ್ತು ನಿರ್ವಹಣಾ ತಂಡ ಧರ್ಮಸ್ಥಳ’ ವತಿಯಿಂದ ಶಾಲಾ ಆವರಣ ಹಾಗೂ ಕೊಠಡಿಗಳ ಸ್ವಚ್ಛತಾ ಕಾರ್ಯಕ್ರಮ ನಡೆಯಿತು.
ತಂಡದ ಸೇವಾ ಪ್ರತಿನಿಧಿ ಸುಜಾತ ಮತ್ತು ಘಟಕ ಪ್ರತಿನಿಧಿ ನಳೀನ್ ಬೇಕಲ್ ಅವರ ನೇತೃತ್ವದಲ್ಲಿ ತಂಡದ ಸರ್ವ ಸದಸ್ಯರು ಶಾಲಾ ಕೊಠಡಿಗಳು ಹಾಗೂ ಸುತ್ತಲಿನ ಪರಿಸರವನ್ನು ಸ್ವಚ್ಛಗೊಳಿಸುವ ಮೂಲಕ ಶ್ರಮದಾನ ಸೇವೆಯನ್ನು ನೀಡಿದರು.
ಈ ಸಮಾಜಮುಖಿ ಕಾರ್ಯದಲ್ಲಿ ಶಾಲಾ ಅಭಿವೃದ್ಧಿ ಮತ್ತು ಮೇಲುಸ್ತುವಾರಿ ಸಮಿತಿ (SDMC) ಅಧ್ಯಕ್ಷರಾದ ಕೆ. ನಂದ, ಸಮಿತಿಯ ಸದಸ್ಯರುಗಳಾದ ರೂಪೇಶ್ ಕೆ., ನರೇಶ್ ಹಾಗೂ ನಾಗೇಶ್ ಅವರು ಕೈಜೋಡಿಸಿದರು.
ಅಲ್ಲದೆ, ಶಾಲಾ ಮುಖ್ಯ ಶಿಕ್ಷಕಿ ಪುಷ್ಪಾ ಎನ್., ಸಹ ಶಿಕ್ಷಕಿಯರಾದ ವಿಜಯ, ಹೇಮಲತಾ, ಅತಿಥಿ ಶಿಕ್ಷಕರಾದ ಭವ್ಯ, ಜಯಶ್ರೀ, ಕಾವ್ಯ, ಸಹಾಯಕಿಯರಾದ ಪ್ರಸನ್ನ ಹಾಗೂ ಯಶೋಧ ಮತ್ತು ಅಕ್ಷರ ದಾಸೋಹ ಸಿಬ್ಬಂದಿ ವರ್ಗದವರು ಶ್ರಮದಾನದಲ್ಲಿ ಭಾಗವಹಿಸಿದ್ದರು.
ಶೌರ್ಯ ಮತ್ತು ವಿಪತ್ತು ನಿರ್ವಹಣಾ ತಂಡವು ತುರ್ತು ಸಂದರ್ಭಗಳಲ್ಲಿ ಹಾಗೂ ಶಾಲಾ-ಸಮುದಾಯ ಮಟ್ಟದಲ್ಲಿ ನೀಡುತ್ತಿರುವ ಸಮಾಜಮುಖಿ ಸೇವೆಯನ್ನು ಈ ಸಂದರ್ಭದಲ್ಲಿ ಶ್ಲಾಘಿಸಲಾಯಿತು.
ಶಾಲೆಯ ಕಡೆಗೆ ತಂಡವು ನೀಡಿದ ಈ ಮಾದರಿ ಸೇವೆಗಾಗಿ ಶಾಲಾ ಮುಖ್ಯ ಶಿಕ್ಷಕಿ, ಶಿಕ್ಷಕ ವೃಂದ, SDMC ಅಧ್ಯಕ್ಷರು, ಸದಸ್ಯರು, ಪೋಷಕರು ಹಾಗೂ ವಿದ್ಯಾರ್ಥಿ ವೃಂದದ ಪರವಾಗಿ ಹೃದಯಸ್ಪರ್ಶಿ ಕೃತಜ್ಞತೆಗಳನ್ನು ಸಲ್ಲಿಸಲಾಯಿತು.
