ಕರ್ನಾಟಕ ಪಬ್ಲಿಕ್ ಸ್ಕೂಲ್ ಪುಂಜಾಲಕಟ್ಟೆಯ ಪ್ರೌಢಶಾಲಾ ವಿಭಾಗದ 1994-96 ರಲ್ಲಿ ವಿದ್ಯಾರ್ಜನೆ ಗೈದು ಇದೀಗ ವಿವಿಧ ಕ್ಷೇತ್ರಗಳಲ್ಲಿ ತಮ್ಮದೇ ಆದ ಛಾಪನ್ನು ಒತ್ತಿ ಸಾಧನೆಯ ಶಿಖರವನ್ನು ಏರಿರುವ ವಿದ್ಯಾರ್ಥಿಗಳ ಸಮ್ಮಿಲನವು ಇತ್ತೀಚೆಗೆ ತಾವು ಕಲಿತ ಸಂಸ್ಥೆಯಲ್ಲಿಯೇ ನಡೆಯಿತು.
ಇದು ಸ್ನೇಹ ಸಮ್ಮಿಲನ, ಭಾಂದವ್ಯದ ಮಿಲನ, ಬಂಧುತ್ವದ ಮಿಲನ, ವಿಚಾರ ವಿಮರ್ಶೆಗಳನ್ನು ಹಂಚಿಕೊಂಡಿರುವ ಮಿಲನ, ಅಂದಿನ ದಿನವನ್ನು ಮೇಲುಕು ಹಾಕಿದ ಮಿಲನ, ಕಲಿಕೆಯಲ್ಲಿ ತೊಡಗಿಸಿಕೊಂಡ ಆ ದಿನವನ್ನು ನೆನಪಿಸಿಕೊಂಡ ಮಿಲನ, ಅಂದು ಕಳಿಸಿದ ಗುರುಗಳನ್ನು ಸ್ಮರಿಸಿದ ಮಿಲನ, ಆ ದಿನದ ಆಟ ಪಾಠ ಜೊತೆಯಾಗಿ ಊಟ ಮಾಡಿರುವ ಸಂತಸದ ಮಿಲನ ಎಂದು ಹಿರಿಯ ವಿದ್ಯಾರ್ಥಿಗಳು ತಮ್ಮ ತಮ್ಮ ಅನಿಸಿಕೆಗಳನ್ನು ಹೃದಯ ಬಿಚ್ಚಿ ಹಂಚಿಕೊಂಡರು.
ಕಾರ್ಯಕ್ರಮದಲ್ಲಿ ಆ ದಿನಗಳಲ್ಲಿ ಇದ್ದಂತಹ *ಬಡತನ-ಸಿರಿತನ-* ಎಂಬ ಬೇದ ಭಾವವನ್ನು ಇಟ್ಟುಕೊಳ್ಳದೆ ಎಲ್ಲರೂ ಜೊತೆಯಾಗಿ ಕಳೆದ ದಿನಗಳು ಅದು ಶಾಶ್ವತ ಹಾಗೂ ಅಮರ ಎಂದು ಪ್ರತಿಯೊಬ್ಬರು ತಮ್ಮ ತಮ್ಮ ಅನಿಸಿಕೆಯಲ್ಲಿ ಹಂಚಿಕೊಂಡರು. ಅಷ್ಟು ಮಾತ್ರವಲ್ಲದೆ ಪ್ರಸ್ತುತ ಸಂಸ್ಥೆಯ ಬೇಡಿಕೆಗಳ ಬಗ್ಗೆ ವಿಮರ್ಶೆಯನ್ನು ಮಾಡಿ ಈ ಸಂಸ್ಥೆಗೆ ನಮ್ಮದೇ ಆದ ಕೊಡುಗೆಯನ್ನು ಕೊಡಲು ನಾವು ಸದಾ ಸಿದ್ಧ ಎಂದು ಪ್ರತಿಯೊಬ್ಬರು ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದರು.
ಇದೇ ಸಂದರ್ಭದಲ್ಲಿ ಕಲಿಕಾ ಗುರುಗಳಾದ ಕುಮುದ ಎಂ ಹಿಂದಿ ಶಿಕ್ಷಕಿ ಇವರಿಗೆ ಸರ್ವರು ಜೊತೆ ಸೇರಿ *ಗುರು ನಮನ* ಸಲ್ಲಿಸಿ ಗೌರವಿಸಿದರು. ಮಾತ್ರವಲ್ಲದೆ ಆರಂಭದಲ್ಲಿ ಸಂಸ್ಥೆಗೆ ಅತಿ ಅಗತ್ಯವಾಗಿ ಪ್ರಯೋಜನವಾಗುವ ಫ್ಯಾನ್ಗಳನ್ನು ನೆನಪಿಗಾಗಿ, ಸಂಸ್ಥೆಯ ಉಪ ಪ್ರಾಂಶುಪಾಲರು ಹಾಗೂ ಶಾಲಾ ಅಭಿವೃದ್ಧಿ ಮತ್ತು ಮೇಲುಸ್ತುವಾರಿ ಸಮಿತಿಯ ಅಧ್ಯಕ್ಷರ ಹಾಗೂ ಹಿರಿಯ ವಿದ್ಯಾಥಿ ಸಂಘದ ಅಧ್ಯಕ್ಷರ ಸಮ್ಮುಖದಲ್ಲಿ ಹಸ್ತಾಂತರ ಮಾಡಿದರು.
ಈ ಸಭೆಯ ಅಧ್ಯಕ್ಷತೆಯನ್ನು ಪ್ರಕೃತ ಸಂಸ್ಥೆಯ ಉಪ ಪ್ರಾಂಶುಪಾಲರಾಗಿರುವ ಗಣೇಶ್ ರವರು ವಹಿಸಿಕೊಂಡು ಸಭೆಯನ್ನು ಮುನ್ನಡೆಸಿದರು. ವೇದಿಕೆಯಲ್ಲಿ ಹಿರಿಯ ವಿದ್ಯಾರ್ಥಿ ಸಂಘದ ಅಧ್ಯಕ್ಷರಾದ ಶಾಮಪ್ರಸಾದ್ ಸಂಪಿಗೆ ತ್ತಾಯ, ಹಿರಿಯ ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿಗಳಾದ ಮಂಜಪ್ಪ ಮೂಲ್ಯ , ಪ್ರಸ್ತುತ ಸಾಲಿನ ಶಾಲಾ ಅಭಿವೃದ್ಧಿ ಮತ್ತು ಮೇಲುಸ್ತುವಾರಿ ಸಮಿತಿಯ ಅಧ್ಯಕ್ಷರಾದ ದಿವಾಕರ ಶೆಟ್ಟಿ ಕಂಗಿತ್ತಿಲು ಸದಸ್ಯೆ ಪ್ರೀತಿ ಹಾಗೂ ಪ್ರೌಢಶಾಲಾ ವಿಭಾಗದ ಸದಸ್ಯರು, ತಮಗೆ ಕಳಿಸಿದ ಗುರುಗಳಾದ ಕುಮುದ ಎಂ, ಪ್ರಸ್ತುತ ಸಂಸ್ಥೆಯಲ್ಲಿ ಸಹ ಶಿಕ್ಷಕರಾಗಿ ಕರ್ತವ್ಯ ನಿರ್ವಹಿಸುತ್ತಿರುವ ಧರಣೇಂದ್ರ ಕೆ ಉಪಸ್ಥಿತರಿದ್ದು ಸಂದರ್ಭೋಚಿತವಾಗಿ ಕಾರ್ಯಕ್ರಮದ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿ *ಮತ್ತೊಮ್ಮೆ ನೀವೆಲ್ಲರೂ ಇದೇ ರೀತಿ ವರ್ಷಕ್ಕೊಮ್ಮೆಯಾದರೂ ಜೊತೆಯಾಗಬೇಕು ಎನ್ನುವ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರು.
ಕಾರ್ಯಕ್ರಮವನ್ನು 1994-96 ಸಾಲಿನ ಹಿರಿಯ ವಿದ್ಯಾರ್ಥಿಯಾದ ಉದಯಕುಮಾರ್ ನಿರ್ವಹಿಸಿದರು. ಸುಧಾ ಭಟ್ ಪ್ರಾರ್ಥಿಸಿ, ಸತೀಶ್ ಆಚಾರ್ಯ ಬೆರ್ಕಳ ಸ್ವಾಗತಿಸಿ, ನಾರಾಯಣ್ ರವರು ಧನ್ಯವಾದ ಸಲ್ಲಿಸುವುದರೊಂದಿಗೆ ಸಮಾಪನಗೊಂಡಿತು.
