ಹೊಸಂಗಡಿ ಗ್ರಾಮಸಭೆ – ಗೈರಾಗಿದ್ದ ಕಂದಾಯ ಇಲಾಖಾಧಿಕಾರಿಯನ್ನು ಕರೆಸಿದ ಶಾಸಕರು!

hosangady gramshabe copy ವೇಣೂರು: ರಾಷ್ಟ್ರೀಯ ಪಂಚಾಯತ್‌ರಾಜ್ ದಿನಾಚರಣೆ ಅಂಗವಾಗಿ ಹೊಸಂಗಡಿ ಗ್ರಾ.ಪಂ. ಆವರಣದಲ್ಲಿ ಕರೆಯಲಾಗಿದ್ದ ಗ್ರಾಮಸಭೆಗೆ ಕಂದಾಯ ಇಲಾಖಾಧಿಕಾರಿಗಳು ಗೈರು ಹಾಜರಾಗಿ ಗ್ರಾಮಸ್ಥರ ಆಕ್ಷೇಪದ ಮೇರೆಗೆ ಶಾಸಕ ಕೆ. ವಸಂತ ಬಂಗೇರರವರು ವೇದಿಕೆಯಿಂದಲೇ ದೂರವಾಣಿ ಕರೆ ಮಾಡಿ ಬೆಳ್ತಂಗಡಿ ಉಪ ತಹಶೀಲ್ದಾರ್ ಅಬ್ದುಲ್ ಖಾದರ್‌ರವರನ್ನು ಕೆಲವೇ ನಿಮಿಷಗಳಲ್ಲಿ ಗ್ರಾಮಸಭೆಗೆ ಕರೆತಂದ ವಿದ್ಯಾಮಾನ ಹೊಸಂಗಡಿಯ ಗ್ರಾಮಸಭೆಯಲ್ಲಿ ನಡೆದಿದೆ.
ಕೇಂದ್ರ ಗ್ರಾಮೀಣಾಭಿವೃದ್ಧಿ ಇಲಾಖೆಯ ನಿರ್ದೇಶಕರೂ ಸೇರಿದಂತೆ ಜಿಲ್ಲಾಮಟ್ಟದ, ತಾಲೂಕು ಮಟ್ಟದ ಅಧಿಕಾರಿಗಳು, ಶಾಸಕರು ಹಾಜರಾಗಿದ್ದರೂ ಕಂದಾಯ ಇಲಾಖೆ ಯಿಂದ ಯಾವೊಬ್ಬ ಅಧಿಕಾರಿಯೂ ಹಾಜರಾಗದಿರುವುದಕ್ಕೆ ಗ್ರಾಮಸ್ಥರು ಆಕ್ರೋಶ ವ್ಯಕ್ತಪಡಿಸಿದರು. ಈ ವೇಳೆ ವೇದಿಕೆಯಲ್ಲಿದ್ದ ಶಾಸಕ ಕೆ. ವಸಂತ ಬಂಗೇರರವರು ತಹಶೀಲ್ದಾರ್ ಅವರನ್ನು ಮೊಬೈಲ್ ಕರೆಯ ಮೂಲಕ ಸಂಪರ್ಕಿಸಿ ಗೈರು ಹಾಜರಾಗಿರುವುಕ್ಕೆ ತರಾಟೆಗೆ ತೆಗೆದುಕೊಂಡು ಯಾವುದೇ ನೆಪ ನೀಡದೆ ೨೦ ನಿಮಿಷದಲ್ಲಿ ಗ್ರಾಮಸಭೆಯಲ್ಲಿ ಹಾಜರಿರುವಂತೆ ಸೂಚಿಸಿದರು. ಕೆಲವೇ ನಿಮಿಷಗಳಲ್ಲಿ ಉಪ ತಹಶೀಲ್ದಾರ್ ಅಬ್ದುಲ್ ಖಾದರ್ ಸಭೆಯಲ್ಲಿ ಹಾಜರಾದರು.
ಸಭೆಯಲ್ಲಿ ಉಪಸ್ಥಿತರಿದ್ದ ಕೇಂದ್ರ ಗ್ರಾಮೀಣಾಭಿವೃದ್ಧಿ ಇಲಾಖೆಯ ನಿರ್ದೇಶಕ ಪಿ. ಮನೋಜ್ ಕುಮಾರ್ ಮಾತನಾಡಿ, ಗ್ರಾಮಸಭೆಯಂದು ಕೇವಲ ಗ್ರಾ.ಪಂ.ಗೆ ಆಗಮಿಸದೆ ನಿರಂತರವಾಗಿ ಗ್ರಾಮಸ್ಥರು ಗ್ರಾ.ಪಂ.ನ ಸಂಪರ್ಕದಲ್ಲಿರಬೇಕು. ಪಂಚಾಯತುಗೆ ಇದೀಗ ಸಾಕಷ್ಟು ಅನುದಾನಗಳು ಬರುತ್ತಿದ್ದು, ಅದನ್ನು ಉಪಯೋಗಿಸುವ ಅಧಿಕಾರ ಪಂಚಾಯತ್‌ಗೆ ಇದೆ. ಗ್ರಾಮದ ಸರ್ವಾಂಗೀಣ ಅಭಿವೃದ್ಧಿ ಪಂಚಾಯತ್‌ನ ಆದ್ಯ ಧ್ಯೇಯವಾಗಿರಬೇಕು ಎಂದರು. ಹೊಸಂಗಡಿ ಗ್ರಾ.ಪಂ. ಪ್ರತಿಯೊಂದು ವಿಷಯದಲ್ಲೂ ಇತರ ಪಂಚಾಯತುಗಳಿಗೆ ಮಾದರಿಯಾಗಿ ಕಾಣುತ್ತಿದೆ. ಮೂಲಭೂತ ಸೌಲಭ್ಯಗಳಾದ ರಸ್ತೆ, ಅಂಗನವಾಡಿ ಕೇಂದ್ರಗಳು ಮೇಲ್ದರ್ಜೆಗೇರಿರುವುದು ಗ್ರಾಮೀಣ ಭಾಗದಲ್ಲಿ ಇಷ್ಟೊಂದು ಅಭಿವೃದ್ಧಿ ಹೊಸಂಗಡಿ ಕಂಡು ಸಂತಸವಾಗಿದೆ ಎಂದರು.
ಬೆಳ್ತಂಗಡಿ ಶಾಸಕ ಕೆ. ವಸಂತ ಬಂಗೇರವರು ಗ್ರಾಮ ವಿಕಾಸ ಯೋಜನೆಯ ಕಾಮಗಾರಿಗಳಿಗೆ ಶಿಲಾನ್ಯಾಸ ನೆರವೇರಿಸಿ ಮಾತನಾಡಿ, ಗ್ರಾಮ ವಿಕಾಸ ಯೋಜನೆಯಡಿ ೭೫ ಲಕ್ಷ ರೂ.ವನ್ನು ಹೊಸಂಗಡಿ ಗ್ರಾ.ಪಂ.ಗೆ ಒದಗಿಸಿದ್ದು, ತ್ವರಿತಗತಿಯಲ್ಲಿ ಕಾಮಗಾರಿಗಳು ನಡೆಯಬೇಕಿದೆ. ಹೊಸಂಗಡಿ ಗ್ರಾ.ಪಂ.ಗೆ ೧೦೦ ಮನೆಗಳನ್ನು ಒದಗಿಸಿಕೊಡುತ್ತೇನೆ. ಆದರೆ ಫಲಾನುಭವಿಗಳನ್ನು ಆಯ್ಕೆ ಮಾಡುವ ಕೆಲಸ ಪಂಚಾಯತ್‌ನಿಂದ ಆಗಬೇಕು ಎಂದರು.
ಕೋಟ್ಪಾ ಕಾಯ್ದೆಯ ಜಾರಿಯಿಂದ ಲಕ್ಷಾಂತರ ಮಂದಿ ಬಡ ಬೀಡಿ ಕಾರ್ಮಿಕರು ನಿರುದ್ಯೋಗಿಗಳಾಗಿದ್ದಾರೆ, ಬದಲಿ ವ್ಯವಸ್ಥೆಗೆ ಸರ್ಕಾರ ತ್ವರಿತ ಕ್ರಮ ಕೈಗೊಳ್ಳಬೇಕು, ಗಣಿ ಇಲಾಖೆಯ ಅನುಮತಿಯನ್ನು ಆಯಾ ಪಂಚಾಯತ್ ಗೆ ನೀಡಬೇಕು, ಕೂಟೇಲು ರಸ್ತೆಯ ದುರಸ್ಥಿ ಕಾರ್ಯ ನಡೆಯಬೇಕು ಮುಂತಾದ ಬೇಡಿಕೆಗಳನ್ನು ಗ್ರಾಮಸ್ಥರು ಸಭೆಯ ಮುಂದಿಟ್ಟರು. ಗ್ರಾಮಸಭೆಯ ಅಧ್ಯಕ್ಷತೆಯನ್ನು ಹೊಸಂಗಡಿ ಗ್ರಾ.ಪಂ. ಅಧ್ಯಕ್ಷೆ ಹೇಮಾವಸಂತ್ ವಹಿಸಿದ್ದರು. ಸಭೆಯ ನೋಡೆಲ್ ಅಧಿಕಾರಿಯಾಗಿ ಪಂಚಾಯತ್ ಇಂಜಿನಿಯರಿಂಗ್ ಉಪ ವಿಭಾಗದ ಇಂಜಿನಿಯರ್ ಸಿ.ಆರ್. ನರೇಂದ್ರ ಸಭೆಯನ್ನು ನಡೆಸಿಕೊಟ್ಟರು. ನನ್ನ ಮನೆ-ನನ್ನ ರಸ್ತೆ ಯೋಜನೆಯಡಿ ಗಾಂದೊಟ್ಟು ರಸ್ತೆ ಸ್ವಚ್ಛತಾ ಅಭಿಯಾನ ನಡೆಯಿತು.
ದ.ಕ. ಜಿಲ್ಲಾ ಪಂಚಾಯತ್‌ನ ಉಪ ಕಾರ್ಯದರ್ಶಿ ಟಿ.ಎಸ್. ಲೋಕೇಶ್, ಜಿ.ಪಂ. ಸದಸ್ಯ ಪಿ. ಧರಣೇಂದ್ರ ಕುಮಾರ್, ತಾ.ಪಂ. ಸದಸ್ಯ ಓಬಯ್ಯ ಆರಂಬೋಡಿ, ಹೊಸಂಗಡಿ ಗ್ರಾ.ಪಂ. ಉಪಾಧ್ಯಕ್ಷೆ ಲಲಿತಾ ಟಿ. ಹೆಗ್ಡೆ ಸೇರಿದಂತೆ ವಿವಿಧ ಇಲಾಖಾಧಿಕಾರಿಗಳು ಉಪಸ್ಥಿತರಿದ್ದರು.

About The Author

Related posts

Leave a Reply

Your email address will not be published. Required fields are marked *

Copy Protected by Chetan's WP-Copyprotect.