ಬೆಳ್ತಂಗಡಿ: ನಿರೀಕ್ಷೆಗಳನ್ನು ಮೀರಿ ನಾವು ಕೈಗೊಳ್ಳುವ ಕಾರ್ಯವೇ ಎಕ್ಸೆಲ್, ಈ ಸಂಸ್ಥೆಯ ದೂರದೃಷ್ಟಿಯೇ ಅಮೋಘ. ನಾಳೆಯ ದೀಪಿಕಾ ಪಡುಕೋಣೆ, ರಣವೀರ್‌ ಸಿಂಗ್‌, ವಿರಾಟ್‌ ಕೊಯ್ಲಿ, ಇಲಾನ್‌ ಮಸ್ಕ್‌, ಸ್ಯಾಮ್‌ ಅಲ್ಟ್ ಮ್ಯಾನ್‌, ನಾರಾಯಣ ಮೂರ್ತಿ, ಅಮಿತಾಬ್‌ ಬಚ್ಚನ್‌ ಇಲ್ಲಿ ಇದ್ದಾರೆ ಎಂದು ರಮೇಶ್‌ ಅರವಿಂದ್‌ ಎಕ್ಸೆಲ್ ಕಾಲೇಜಿನ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿದರು. ನ.28ರಂದು ಎಕ್ಸೆಲ್ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ಸುಮಂತ್‌ ಒಬ್ಬ ಅದ್ಭುತ ಸಾಧಕ, ಅವರ ಇಚ್ಛಾ ಶಕ್ತಿಗೆ ಈ ಎಕ್ಸೆಲ್ ವಿದ್ಯಾ ಸಂಸ್ಥೆ ಪ್ರತೀಕವಾಗಿದೆ. ಎಕ್ಸೆಲ್ ಎನ್ನುವ ಅರ್ಥಗರ್ಭಿತ ಹೆಸರನ್ನು ಕಾಲೇಜಿಗೆ ಇಟ್ಟಿದ್ದಾರೆ. ಇಲ್ಲಿ ವಿದ್ಯಾರ್ಥಿಗಳ ಫಲಿತಾಂಶದಲ್ಲಿ ಸೆಕೆಂಡ್ ಕ್ಲಾಸ್‌ ಹಾಗೂ ಅನುತ್ತೀರ್ಣ ಇಲ್ಲವೇ ಇಲ್ಲ ಎಂದು ಕೇಳಿ ಅಚ್ಚರಿಯಾಯಿತು. ಇದು ನಿಜಕ್ಕೂ ಮಹಾನ್‌ ಸಾಧನೆ. ಇಲ್ಲಿಗೆ ವಿದ್ಯಾರ್ಥಿಗಳನ್ನು ಕಳುಹಿಸುವ ಮನೆಗೆ ಒಳ್ಳೆಯ ಮಗಳು ಅಥವಾ ಮಗ, ಹಾಗೂ ರಾಷ್ಟ್ರಕ್ಕೆ ಅದ್ಭುತ ನಾಗರಿಕನನ್ನು ಕೊಡುವ ಸಂಸ್ಥೆ ಎಕ್ಸೆಲ್ ಎಂದು ಎಕ್ಸೆಲ್ ವಿದ್ಯಾ ಸಂಸ್ಥೆಯನ್ನು ಶ್ಲಾಘಿಸಿದರು.
ನೀವು ಮಾಡುವ ಪ್ರತಿ ಕೆಲಸವನ್ನೂ ದೇವರು ನೋಡುತ್ತಿದ್ದಾನೆ. ಆತನಿಂದ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ. ಹುಟ್ಟಿದಾಗಲೇ ಪ್ರತಿಯೊಬ್ಬರಿಗೂ ದೇವರು ಉಡುಗೊರೆ ಕೊಟ್ಟಿರುತ್ತಾರೆ. ಅದನ್ನು ನೀವು ತೆರೆದು ನೋಡದೇ ಇದ್ದರೇ ಜೀವನವೇ ವ್ಯರ್ಥ. ಆ ಉಡುಗೊರೆಯನ್ನು ದ್ವಿಗುಣಗೊಳಿಸುವುದೇ ಎಕ್ಸೆಲ್. ಪ್ರತಿ ದಿನ ನಿಮ್ಮನ್ನು ನೀವು ತಿದ್ದಿಕೊಳ್ಳಿ. ಪ್ರತಿ ಜಾಗದಲ್ಲಿ ನಿಮ್ಮ ಕೊಡುಗೆ ಕೊಡುವುದನ್ನು ರೂಢಿಸಿಕೊಳ್ಳಿ. ನಿಮ್ಮ ಬಗ್ಗೆ ನಿಮಗೆ ಅನುಮಾನ ಬೇಡ, ಭಯ ಬೇಡ ಎಂದು ವಿದ್ಯಾರ್ಥಿಗಳ ಜೊತೆ ಸಂಭಾಷಣೆ ನಡೆಸಿದರು.
