ಸುದ್ದಿ ಬೆಳ್ತಂಗಡಿ ೨೫ನೇ ಹಬ್ಬದ ಉದ್ಘಾಟನೆಯಲ್ಲಿ ಫಾ| ಲಾರೆನ್ಸ್ ಮುಕ್ಕುಯಿ, ಕೃಷ್ಣ ಜೆ.ಪಾಲೆಮಾರ್, ಕೆ.ವಸಂತ ಬಂಗೇರ, ಪ್ರತಾಪ್‌ಸಿಂಹ ನಾಯಕ್, ಕುಶಾಲಪ್ಪ ಗೌಡ ಪೂವಾಜೆ, ಶ್ರೀಧರ್ ಬಿಡೆ, ಈಶ್ವರ ದೈತೋಟ, ಡಾ.ಯು.ಪಿ.ಶಿವಾನಂದ, ಮಂಜುನಾಥ ರೈ, ಮುಗುಳಿ ನಾರಾಯಣ ಭಟ್, ಮಮತಾ ಶೆಟ್ಟಿ ಭಾಗವಹಿಸಿದ್ದರು.
ಪ್ರತಿ ಗ್ರಾಮಗಳು ಆ ಗ್ರಾಮದ ಜನತೆಯ – ಯುವಜನರ -ವಿದ್ಯಾರ್ಥಿಗಳ ಹೆಮ್ಮೆಯ ಗ್ರಾಮವಾಗಬೇಕು. ನಮ್ಮ ತಾಲೂಕು ನಮ್ಮ ಹೆಮ್ಮೆಯಾಗಬೇಕು. ಹಾಗೆ ಆಗಬೇಕಾದರೆ ನಮ್ಮ ನಮ್ಮ ಗ್ರಾಮಗಳಲ್ಲಿ ಏನೇನಿದೆ – ಏನೇನಿಲ್ಲ ಎಂಬುದನ್ನು ತಿಳಿದುಕೊಳ್ಳಬೇಕು. ಅದಕ್ಕಾಗಿ ಸುದ್ದಿ ಅರಿವು ಕೇಂದ್ರದ ವತಿಯಿಂದ ಈಗಾಗಲೇ ಗ್ರಾಮಗಳಲ್ಲಿ ನಮ್ಮ ಗ್ರಾಮ-ನಮ್ಮ ಹೆಮ್ಮೆ ಅಭಿಯಾನವನ್ನು ಆರಂಭಿಸಲಾಗಿದೆ.
ನಮ್ಮ ಊರು ನಮ್ಮ ಹೆಮ್ಮೆ ಯಾಗಬೇಕಾದರೆ ನಮ್ಮ ಗ್ರಾಮ ಸ್ವಚ್ಛ ಗ್ರಾಮವಾಗಿರಬೇಕು. ಆರೋಗ್ಯ, ಶಿಕ್ಷಣ, ವಿದ್ಯುತ್, ಕ್ರೀಡಾಂಗಣ, ಈಜುಕೊಳ, ಉತ್ತಮ ರಸ್ತೆ, ಜಿಮ್, ಇಂಟರ್‌ನೆಟ್, ಮನರಂಜನೆಯ ವ್ಯವಸ್ಥೆಗಳೆಲ್ಲ ನಮ್ಮ ಗ್ರಾಮದಲ್ಲಿರಬೇಕು. ಮಳೆಕೊಯ್ಲು ಮಾಡುವುದರ ಮೂಲಕ ಹಾಗೂ ಸೋಲಾರ್ ಶಕ್ತಿಯನ್ನು ಅಳವಡಿಸುವುದರ ಮೂಲಕ ಸ್ವಾವಲಂಬಿಯಾಗಿರಬೇಕು. ಪ್ರತಿ ಮನೆಯೂ ಹಸುರೀಕರಣವಾಗಿರಬೇಕು. ಪ್ರತೀ ಗ್ರಾಮ ಈ ರೀತಿ ಆದಾಗ ‘ನಮ್ಮ ತಾಲೂಕು – ನಮ್ಮ ಹೆಮ್ಮೆ’ ಅನಿಸುತ್ತದೆ. ಗ್ರಾಮದ ಎಲ್ಲ ಸಂಘ ಸಂಸ್ಥೆಗಳು, ನಾಯಕರು, ಜನ ಸಾಮಾನ್ಯರು ಸೇರಿ ಚಿಂತಿಸಲು ಸುದ್ದಿ ಅಭಿಯಾನ ಪೂರಕವಾಗ ಬೇಕೆಂಬುದು ನಮ್ಮೆಲ್ಲರ ಆಶಯ. ಸುಳ್ಯದ ಸುದ್ದಿ ಬಿಡುಗಡೆ ಪತ್ರಿಕೆಗೆ ಈಗಾಗಲೇ ೪೦ ವರ್ಷ ಆಗುತ್ತಿರುವ ಹಿನ್ನಲೆಯಲ್ಲಿ ಸುದ್ದಿ ಸುಳ್ಯ ಹಬ್ಬ ಆಚರಿಸಲು ಸಿದ್ಧತೆ ನಡೆಯುತ್ತಿದೆ.