ಬೆಳ್ತಂಗಡಿ: ಹೋಲಿ ರಿಡೀಮರ್ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಡಿ. 24 ರಂದು ಏಸು ಕ್ರಿಸ್ತನ ಜನ್ಮ ದಿನವನ್ನು ಸಂಭ್ರಮದಿಂದ ಆಚರಿಸಲಾಯಿತು. 1ನೇ, 6ನೇ ಮತ್ತು 7ನೇ ತರಗತಿಯ ವಿದ್ಯಾರ್ಥಿಗಳು ಕಾರ್ಯಕ್ರಮವನ್ನು ನಿರ್ವಹಿಸಿದರು.
ಶಾಂತಿದೂತ ಏಸು ಕ್ರಿಸ್ತನ ಜನನದ ಹಿನ್ನೆಲೆ, ಜೀವನ ಸಂದೇಶವನ್ನು ಸಾರುವ ನೃತ್ಯ ರೂಪಕಗಳು, ಹಬ್ಬಕ್ಕೆ ಶುಭಾಶಯಗಳನ್ನು ಕೋರುವ ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೂಲಕ ಮನರಂಜನೆಯ ಜೊತೆಗೆ ಹಬ್ಬದ ಮಹತ್ವವನ್ನು ಸಾರಿದರು.
ಕ್ರಿಸ್ ಮಸ್ ಮರ, ಗೋದಲಿ, ನಕ್ಷತ್ರಗಳು, ಉಡುಗೊರೆಗಳು ಮತ್ತು ಸಾಂತಾಕ್ಲಾಸರ ಆಗಮನವು ಹಬ್ಬದ ವಿಶೇಷತೆಯಾಗಿ ಎಲ್ಲರನ್ನೂ ಆಕರ್ಷಿಸಿತು. ಕಾರ್ಯಕ್ರಮದ ಮುಖ್ಯ ಅತಿಥಿ ವಂ. ಫಾ. ಜೇಸನ್ ಲೋಬೊ ನಾವು ಹಬ್ಬದ ಸಂದೇಶವನ್ನು ಅರಿತು ಶಾಂತಿ ಮತ್ತು ಪ್ರೀತಿಯನ್ನು ಜಗತ್ತಿನಾದ್ಯಂತ ಸಾರಬೇಕು ಎಂದು ನುಡಿದು ಶುಭ ಹಾರೈಸಿದರು.
ಶಾಲಾ ಮುಖ್ಯೋಪಾಧ್ಯಾಯ ವಂ. ಫಾ. ಕ್ಲಿಫರ್ಡ್ ಪಿಂಟೋ ಅತಿಥಿ ಪರಿಚಯ ಮಾಡಿ ಭೂಮಿಯ ಮೇಲೆ ದೇವರು ಮಾನವ ರೂಪದಲ್ಲಿರುತ್ತಾನೆ. ನಾವು ಪ್ರತಿಯೊಬ್ಬರಲ್ಲಿಯೂ ದೇವರನ್ನು ಕಂಡು ಪ್ರೀತಿಯಿಂದ ಬದುಕಬೇಕೆಂದು ನುಡಿದು ಶುಭ ಹಾರೈಸಿದರು.
ರಾಷ್ಟ್ರಮಟ್ಟದ ಕರಾಟೆ ಸ್ಪರ್ಧೆಗಳು ಮತ್ತು ಜೆ. ಸಿ. ಐ ಬೆಳ್ತಂಗಡಿಯಲ್ಲಿ ನಡೆದ ಸಾಂಸ್ಕೃತಿಕ ಸ್ಪರ್ಧೆಗಳಲ್ಲಿ ವಿಜೇತರಾದ ಪ್ರತಿಭಾನ್ವಿತ ವಿದ್ಯಾರ್ಥಿಗಳನ್ನು ಅಭಿನಂದಿಸಲಾಯಿತು. ಕಾರ್ಯಕ್ರಮದಲ್ಲಿ ಶಾಲಾ ಶಿಕ್ಷಕ ರಕ್ಷಕ ಸಂಘದ ಉಪಾಧ್ಯಕ್ಷ ರಮೇಶ್ ಉಪಸ್ಥಿತರಿದ್ದರು. ಹಬ್ಬದ ಪ್ರಯುಕ್ತ ಕ್ರಿಸ್ ಮಸ್ ಕೇಕನ್ನು ಕತ್ತರಿಸಲಾಯಿತು. ಶಾಲಾ ಸಿಬ್ಬಂದಿ ವರ್ಗ ಹಾಗು ವಿದ್ಯಾರ್ಥಿಗಳಿಗೆ ಕ್ರಿಸ್ ಮಸ್ ಕೇಕ್ ಹಾಗೂ ವಿಶೇಷ ತಿಂಡಿಗಳನ್ನು ಹಂಚಲಾಯಿತು. ವಿದ್ಯಾರ್ಥಿಗಳಾದ ನಿಹಾ, ಸ್ವಲೀಹಾ ಮತ್ತು ಶೆರ್ವಿನ್ ಸ್ವಾಗತಿಸಿ, ಸಾಯಿ ಖುಷಿ ಹಾಗೂ ಜೇಸನ್ ವೇಗಸ್ ಕಾರ್ಯಕ್ರಮದ ನಿರೂಪಣೆ ಗೈದರು. ಸಹಶಿಕ್ಷಕಿಯರಾದ ಜೊನಿಟಾ ಕೊರೆಯ, ಲವೀನಾ ಮಿನೇಜಸ್, ವಿನಿತಾ ಮೋರಸ್ ಮತ್ತು ರೆನಿಟಾ ಲಸ್ರಾದೋ ಸಹಕರಿಸಿದರು. ಸುಹಾ ಫಾತಿಮಾ ವಂದಿಸಿದರು.